Аз гуруснагӣ то ба серӣ

Олим Амонов нафарест, ки доиман аз партовгоҳҳо барои худаш чизи лозима меҷӯяд. Ин нафар мегӯяд, ҳамарӯза нонпораҳоро дар партовгоҳ мебинад ва гиламандӣ аз он дорад, ки имрӯз нон ба шумори беқадртарин чиз дохил шудааст.

Бо он ки нонро аз ахлотҷой ёфтан барои Олим ба ҳайвонҳои хонагиаш хӯроки хубест, аммо назари ӯ тамоман дигар аст, чун аз партофтани нон дар партовгоҳ ба қавли худаш ҳеҷ гоҳ истиқбол накардааст ва намекунад. 
"Нонро дар баробари партов донистан худ курнамакиест ва гуноҳи нобахшиданӣ. Агар солҳои 1992- ро ба ёд биёрем, манзараи ниҳоят даҳшатборе пеши назар меояд, ки он вақт мардум барои як пора нон ҳатто одамкӯшӣ мекарданд".

                                                                  Акси Олим Амонов

Олимов гарчанде он солҳоро бештар аз нақли калонсолҳо ёдоварӣ мекунад, вале худаш низ борҳо ба мушкили бенонӣ рӯ ба рӯ шудааст ва ҳеҷ гоҳ розӣ нест, ки мардум нонро беқадр кунанду ба партовгоҳ партоянд.

      Навори видеоӣ дар барномаи Гуфтаниҳо

    Суроѓа дар youtube:   
          https://www.youtube.com/watch?v=6A8kX2h1kko                  

                                                                        

Давлати Шоҳэҳтибор, сокини шаҳри Бохтар мегӯяд, ҳанӯз ёд дорад, ки дар солҳои Љанги шаҳрвандӣ ба хотири дарёфти нон дар навбат зери по монда аз шаҳри Душанбе бо дасти бе нон гурусна ба хона баргашта буд.

                                                                         Акси Давлати Шоҳэҳтибор                                                           

"Тасаввур кунед, он вақт мардум ҷугорӣ, сабус ва кунҷораро ҳатто орд карда мехурданд. Он солҳо бояд барои мардуми имрӯза ибрат бошад, ки ба қадри бузургии нон бирасанд, аммо баръакси ин зиёд мушоҳида мекунем, ки нон дар партовгоҳ аст".

Оқои Давлат бар он назар аст, ки нон барои инсоният зиндагист ва агар нисбати зиндагӣ беқадрӣ кунем, гуноҳи азим аст.

Маҳина, сокини шаҳри Леваканд дар муқобили ин гуфтаҳо ақидаи дигар дорад ва мегӯяд нон, ки хушк шуд бояд ба партовгоҳ партофта шавад, чун ба гуфтаи ӯ дигар лозим намеояд. 
"Нонҳои хушкидаро мардум куҷо баранд охир, вақте бо хушкии худ дигар даркор намешаванд. Аз партофтани нон ба партовгоҳ фикр мекунам, ки нафарони махсуси дигар ниёзи бенонии худро бароварда мекунанд".

Аммо Маҳина шояд андеша накардааст, ки агар нонҳои дар ахлотҷой партофташуда зери ахлотҳои дигар монаду нафарони ба қавлаш махсус онро дарёфт накунанд, пас чӣ мешуда бошад.

                                                                    Акси Фазлиддин Мањмадќулов

Фазлиддин Маҳмадқулов, донишҷӯест, ки партофтани нонро дар ахлотҷой тамоман қабул надорад ва мегӯяд, вақте, ки нон хушк мешавад, мардум шояд маҷбур мешаванд, ки чунин кор кунанд. Фазлиддин пешниҳод дорад, ки нони хушкшударо метавон ба қавле талқон кард. "Беҳтар аст, ки ба ин  васила нонро ҳифз кунем, то ба партовгоҳ наравад"

Нон аз шумори муқаддасотест, ки мардум ҳамеша ба он ниёз дорад. Ҳамин аст, ки нонро баробари ҷон баҳо додаанд. Агар чунин беқадрӣ нисбати нон тӯл кашад, метавонад оқибати нохубе дошта бошад.                                                                                                   

                                                                                                                                          

                                                                                   Зеваршоњ Ѓозиев